နွေညတစ်ညကိုဖြတ်သန်းခြင်း
~~~~~~~~~~~~~~~~~
ပန်ကာလည်သံက
လေအပူကိုကြောက်ရွံ့နေတယ်
စက္ကန့်လက်တံဆီက
နှေးလွန်းတာခွင့်လွှတ်ဖို့တောင်းပန်သံကြားရတယ်
ခွေးအူသံတွေက
နွေညကိုပိုပြီးအထီးကျန်စေတယ်
တိမ်မဲ့ကောင်းကင်ကိုမော့ကြည့်တော့
မသာတဲ့ လမင်းကို မြင်တယ်
အလည်ရောက်လာတဲ့ လေအေးအေးတွေ
ငါ့အခန်းတံခါးဝမှာအငွေ့ပျံသွားတယ်
ဟိုဘက်အိမ်ကဖွင့်ထားတဲ့ နွေရာသီသီချင်းသံ
တစ်စုံတစ်ရာကို လွမ်းဆွေးဖို့ ဖန်တီးနေတယ်
အိပ်ယာပေါ်မှာလဲလျောင်းနေတဲ့ခဏတာဟာ
နှစ်များစွာကြာမြင့်ခဲ့သလို တိတ်ဆိတ်သွားတယ်
ကုတင်ပေါ်မှာငြိမ်သက်နေတဲ့ mobile phone က
ချစ်သူဆီကခေါ်သံကို စောင့်မျှော်နေတယ်
မျက်နှာကျက်ပေါ်က ပုံရိပ်တွေကိုဘာသာပြန်တော့
ကပိုကရိုရယ်နေတဲ့အပြုံးရှင်ကိုတွေးမြင်တယ်
No comments:
Post a Comment