စက်ဝိုင်းတစ်ကောင်၏မှတ်စု
~~~~~~~~~~~~~~~~
ယောက်ျားထု ၇၀ ရာနှုန်းက
ငါ့ကို
အရူးအမူးစွဲလမ်းကြတယ်
ငါရှိတဲ့ဘယ်နေရာမဆို
ငါလှုပ်ရှားမယ့်ဘယ်အချိန်မဆို
သူတို့
စောင့်ကြိုငံ့လင့်ကြတယ်.......။
သူတို့အချင်းချင်း
ငါ့ကိုလုယက်ကြရင်း
ရင်းနှီးခြင်းတွေဖော်ဆောင်ကြတယ်
ပြိုင်ဆိုင်မှုတွေထုဆစ်ကြတယ်
ငါ့ကိုခုတုံးလုပ်ပြီး
အလောင်းအစားတွေအကြီးကြီးဖန်တီးကြတယ်
ငါနဲ့ပတ်သက်လာရင်
မိန်းမလည်းစကားလည်းနားမထောင်ဘူး
အမေ့စကားလည်းမကြားယောင်ပြု
ဒါကြောင့်ငါက
နေရင်းထိုင်ရင်း သွေးခွဲသူ ဖြစ်ရတယ်.......။
ငါနိုင်ငံခြားသွားရင်
သူတို့အားလုံး ငါ့ကို ပိုချစ်ကြတယ်
ငါ့ခြေလှမ်းတွေကို အမြဲစောင့်ကြည့်ကြတယ်
ငါ့လှုပ်ရှားမှုတွေကိုအကဲခတ်ကြတယ်
ဒါကြောင့်ငါက
ဘာမဆိုင်ညာမဆိုင် မျိုးချစ်စိတ်လှုံ့ဆော်သူ ဖြစ်ရတယ်
ရံဖန်ရံခါ
ကလေးတွေကငါ့ကိုမိုးရွာထဲဆွဲခေါ်ကြတယ်
ငါ့မှာ
ရွှံ့ ဗွက်တွေတပေပေမိုးရေတွေတရွှဲရွှဲနဲ့
အလူးအလဲခံရတယ်
ဒါပေမယ့် ငါ ပျော်ပါတယ်
ကလေးတွေကအပြစ်ကင်းတယ်လေ......။
လူကြီးတွေက
ငါ့ကို အသုံးချကြတယ်
သူတို့အောင်မြင်ထင်ပေါ်ဖို့
သူတို့ငွေကြေးအမြတ်အစွန်းရဖို့
သူတို့နာမည်ကြီးလူသိများဖို့
ငါက
တရားခံဖြစ်ရတယ်
ဓားစာခံဖြစ်ရတယ်
တစ်ခါတစ်ရံ
ချစ်ကြည်ရေး ဆိုတဲ့ ခေါင်းစဉ်ကြီးနဲ့
ငါ့ကို အမုန်းတံဆိပ်တွေကပ်ကြတယ်
အာဃာတလက်မှတ်တွေဖြန့်ကြတယ်
တစ်ယောက်နဲ့တစ်ယောက်ပွေ့ဖက်ကြရင်း
စိတ်အတွင်းက အံကြိတ်ကြတယ်
တွေးရင်းနဲ့ ဒီလောဘသားတွေအတွက်
ငါ......
ရင်မောလိုက်တာ.......။
ကျေးလက်တောရွာတွေရောက်ရင်တော့
ငါ စိတ်သက်သာရပါတယ်
သူတို့ငါ့ကိုချစ်တာက ရိုးသားတယ်
မာနမပါဘူး လောဘမပါဘူး
အတ္တမပါဘူး ဟန်ဆောင်မှုမပါဘူး
ငါ့ကို အပြိုင်အဆိုင် သူတို့ ပွေ့ဖက်ကြတာက
ရယ်မောစရာ သနားစရာ
ပြီးတော့ မြတ်နိုးစရာ......။
အားလုံးကငါ့ကိုအမျိုးမျိုးသတ်မှတ်ကြတယ်
ငါကကံကြမ္မာနဲ့တူတယ်တဲ့
ဘာမှကြိုတွေးထားလို့မရလို့လေ
ငါကကမ္ဘာကြီးနဲ့တူတယ်တဲ့
မျက်နှာဝိုင်းဝိုင်းချောချောမွတ်မွတ်မို့လေ
ငါကိုအလောင်းကစားသမားတွေက
တစ်လုံး လို့ခေါ်ကြတယ်
ဇာတာထဲကငါ့နာမည်က football တဲ့လေ
မြန်မာလူမျိုးအချို့ငါ့ကိုခေါ်တာ
နားရှက်စရာကောင်းပါတယ်
ဖွတ်...ဘော.....တဲ့
အီး.....ငို ချင် တာ.......။
Sunday, July 5, 2015
စက်ဝိုင်းတစ်ကောင်၏မှတ်စု
Subscribe to:
Post Comments (Atom)
No comments:
Post a Comment