တစ်သက်မှာတစ်ခါ
~~~~~~~~~~~
တစ်သက်မှာတစ်ခါ
အသက်နှစ်ဆယ်ပြည့်ခဲ့ပါပြီ
အချိန်ဟူသည်
အရာရာကိုဖန်ဆင်းသော
အဆုံးမဲ့သဘာဝတရားဖြစ်၏
တစ်သက်မှာတစ်ခါ
အချစ်စစ်တစ်ခုကိုပိုင်ဆိုင်ခဲ့ဖူးပြီ
အချစ်စစ်ဟူသည်
လူတွေဖွင့်ဆိုချက်မှားနေသော
အချိန်၏သားတော်တစ်ပါးဖြစ်၏
တစ်သက်မှာတစ်ခါ
အီတလီခေါက်ဆွဲစားဖူးခဲ့ပြီ
အစားအသောက်ဟူသည်
ဘယ်တော့မှနှစ်ကြိမ်စား၍မရသော
ရသတဏှာ၏ ကျေးကျွန်ဖြစ်၏
တစ်သက်မှာတစ်ခါ
ခြေသည်းလက်သည်းများညှပ်လိုက်ပြီ
ခန္ဓာကိုယ်၏ဘေးထွက်ပစ္စည်းများသည်
နောက်တစ်ကြိမ်ပြန်သုံးခွင့်မရသော
ဒုက္ခသစ္စာ၏ မှတ်စုများဖြစ်၏
မှန်ပါ၏
အရာရာသည်
တစ်သက်မှာတစ်ခါသာဖြစ်ခဲ့ကြပါ၏
No comments:
Post a Comment